"Ургах наран" гэдэг гоё нэртэй орон сууцны хорооллын тухай нэгэн уншигчийнхаа хүсэлтээр фото сурвалжлага бэлдсэнээ сонирхуулъя.

"Тэнгэр" санхүүгийн нэгдлийн ерөнхий захирал Ч.Ганхуяг (ХАС банкны гүйцэтгэх захирал байсан), Хотын захирагч байсан, УИХ-ын гишүүн Ц.Батбаяр нар бага, дунд орлоготой иргэдийг хямд үнэтэй орон сууцаар  хангах зорилгоор "Монгол мөрөөдөл" төслийг анх санаачлан TV5 телевизийн захирал Д.Сарангэрэлтэй хамтран хэрэгжүүлэхээр болж, Blue Sky Partners компанийг байгуулан, гүйцэтгэх захирлаар нь TV5 телевизийн хөтлөгч Г.Ганбаярыг томилжээ. "Монгол мөрөөдөл" төсөл нь "Ургах наран" хороолол нэрээр та бидэнд танил болсоор жил хагас болж байна. Анхны байруудаа 2008 оны 6 сард албан ёсоор ашиглалтанд оруулсан ч (айлууд нь байрандаа намар орсон) мэргэжлийн хяналтынхан хүлээж авахаас татгалзсаар байна. Ямар учиртайг дор зах зухаас нь харна биз.

BSP компани дээр очиж төсөлтэй нь танилцах том бодолтой нэлээн хайсан боловч амжилт олсонгүй. Сонирхолтой нь ХАС банкны зээлийн эдийн засагчид, оффис менежерүүд энэ компани хаана байдгийг мэддэггүй юм байна. Актив зуучийн өгсөн хаягаар СТӨ-ний 1107 тоотод очсон ч тийм компани байдаггүй гэнэ. Жижүүрийх нь дэвтрээс шалгаж үзээд мөн л олоогүй тул Ийгл телевизийнхэн шиг Г.Ганбаярлуу утасдах шаардлагагүй гэж үзэн эрлээ зогсоосон юм. Хэрэв уншигч та бүхэн энэ компанийн талаар мэдээлэл олвол надад хэлээрэй гэж хүсье.

NMCG компанийн барьж ашиглалтанд өгсөн эхний 114 айлын гурван орон сууцнаас цөөн хэдэн байр үлдсэн бөгөөд м2 нь 550 долларын үнэтэй зарж байна. Эдгээр эхний барилгууд чанарын шаардлага хангаагүй тул гүйцэтгэгчээ сольсон нь лав. Одоо "ЭЭН" констракшны барьж байгаа 144 айлын гурван орон сууцыг Актив зууч компани м2-г нь 825000 төгрөгөөр албан ёсоор борлуулж байна. Одоогийн ханшаар бодвол 580 доллар орчим болох байх. Мөн ХАС банк зөвхөн энэ хорооллын байрнуудад 1,29 хувийн хүүтэй, 20 хувийн урьдчилгаа, 15+5 жилийн хугацаатай долларын зээлийг олгож байгаа юм байна. Онцлог нь ханшаас шалтгаалсан хувьсагч хүүтэй. Зээлээ доллароор аваад төгрөгөөр төлөхдөө ханшийн зөрүүг байнга бодолцож, толгойгоо ажиллуулах шаардлагатай.

За ингээд олон юм нуршилгүй зургаа сонирхуулъя. Мэргэжлийн зурагчин биш, бас сонирхогчийн аппаратаар авсан гэдгээ урьдчилаад хэлчихье.

BSP буюу Blue Sky Partners компанийн захиалгаар NMCG компанийн барьсан "Ургах наран" хорооллын  эхний 114 айлын 4 давхар гурван орон сууц.

Дажгүй сайхан зам тавьсан байналээ.

Баянзүрх уулын өвөрт цэцэрлэг, сургууль, үйлчилгээний төв гээд юм юмтай том хороолол босох төлөвлөгөөтэй.

 

Нэлээн цаана Туул голын бургас байгааг харж байна уу үгүй юу. Тэгээд цаана нь Улиастай харагдаж байна. Сүхбаатарын талбайгаас 16 км зайтай гэсэн. Миний тооцоогоор яагаад ч юм 18 км болсон.

Зам харгуйгаа зассан болохоор сайхан цэвэрхэн харагдаж байна.

Машин зогсоол нь гараж талдаа буюу орцныхоо эсрэг талд.

Уулын энгэр болохоор газар нь жаахан налуу. Харин яагаад ч юм үүнийг бодолцолгүй барьснаас нэг давхрын айлууд бараг л ... юу ч гэмээр юм дээ

За энийг хараад ойлгосон байх. Хаалгаар орох гэж явалгүй шууд цонх, тагтаараа орж болно биз дээ?... Арай л дэндүү намхан.

Орцонд нь нэг иймэрхүү зарлалууд байхийн. Ямар учиртайг мэдэхгүй, уг нь хотын цэвэр усны нөөцийн станц эндээс холгүй байдаг болохоор цэвэр ус нь төвийн системд холбогдсон.

 

Айл ороогүй шинэ байрны угаалгын өрөө. Зарим айл нь босоо дүүштэй.

Зарим нь иймэрхүү мини ваннтай. Шинэ байр гэхэд нэг л царай муутай.

Дөрвөн давхрын байрнууд нь анхны борооноор усанд автах шахсан гэнэ.

Шалны материал, шахалт зэрэг нь иймэрхүү.

Айл ороогүй шинэ байр гэж хэлсэн байхаа.

Өрөө хоорондын хана нь дажгүй зузаан байгааг хараарай.

"Бүргэд" биш хаалга гэж одоо хаана ч байхгүй. Гэхдээ чанар болоод өнгө үзэмжийн ялгаа асар их.

Одоо баригдаж байгаа шинэ байрны гараж ил байгааг анзаараарай. Нэг давхрын айлууд санаа зовохооргүй дээр байгаа биз. Ийм 5 давхар 144 айлын гурван орон сууц баригдаж байгаа. Барилгын ажил 50 хувьтай явж байгаа гэж Актив зуучийнхан ярьсан бол хяналтын инженер нь угсралтын ажил 50 хувьтай байгаа гэж хэлсэн. Ялгаа байгаа биз? Актив зуучийнхан 3-р улиралд ашиглалтанд өгнө гэхэд, инженер нь 11 сард гэж байналээ.

"ЭЭН Констракшн" гэдэг компани ХАС банкны ажилчдын 20 зуслангийн байр, Их Засаг их сургуулийн спорт заалыг барьсан "арвин туршлагатай" компани. Туслан гүйцэтгэгчид нь нөгөө л хужаа нар. Ойрын 2-3 жилд ашиглалтанд орсон байгаа 3 байртайгаа нийлээд нийт 12 ийм орон сууц барих төлөвлөгөөтэй... Барилгын материалууд ихэнх нь эх орны үйлдвэрийн гэх хяналтын инженерээс энэ тоосгонууд хувийн үйлдвэрийн тааруухан эд харагдах шиг гэсэн чинь юм дуугарсангүй.

Дахиад 2 байшингийн суурь байна. Энд MCS Property компани өөрийн ажилчдын байрыг барихаар гэрээ хийсэн сурагтай. Үүгээр зогсохгүй нөгөө гурван орон сууцанд бас гүйцэтгэгчээр оролцоно гэж Актив зуучийнхан ам гарч байналээ. Хяналтын инженерийн ярианы өнгөөр бол эхний гурван байрыг тааруухан барьснаа хүлээн зөвшөөрч эдгээр байруудаа нэлээн чамбай барих санаатай байгаа бололтой. Ямар ч байсан сүүлийн байрнуудын суурийг сайн цутгасан харагданалээ...Өө тийм бас Германы GTZ-ийнхэн хяналт тавих юм гэсэн.

Байрныхаа хажууд хүүхдийн тоглоомын талбай барьсан гэж байгаа. Гэм нь замтайгаа дэндүү ойрхон.

Нэг байр нь 6 машины 4 гаражтай.

Дээврээ засаж байна. Уулзсан хүн болгон цонхны амалгааг муу хийснийг гайхаж байлаа. Авахаас харин барьсан бол болоо гээд алга болчихгүй, зайлуул засвар хийгээд байгаа гэж оршин суугчид нь ярьж байсан. Ер нь ихэнх айлууд дотор заслаа дахиж хийлгэсэн гэх юм билээ. Засвар хийсээр байтал шатаж дуусч байгаа байх гэж халаглах нэгэн ч таарсан. Г.Ганбаяр захирал ойр ойрхон ирж, засвар хийж байгаа ажилчиддаа ташуур өгдөг гэнэлээ.

Бохирын шугам нь төвийн шугамд холбогдохыг хүлээвэл 2-3 жилээс наашгүй байх гэж слесарь өвөө айлдаж байналээ. Налайхаас татсан бохирын шугам Улиастайн гүүрний орчим хүрээд зогссон, цаашаа төвийн шугамтай холбогдоход дахиад 3 км орчим дутуу. "Боорчи" компани энэ ажлыг хийж байгаа.

 

 

 

 

 

 

 

 

 

 

 

 

 

 

 

 

Өнгөрсөн өвөл зүүн талын хуучин зуухаар халаасан гэнэ. Оршин суугчид зарим нь сэрүүхэн, зарим нь хүйтэн өвөлжсөн гэцгээж байсан. Слесарь өвөө харин "паартай байрныхан дулаан байна гэж ямар ярих биш дээ" гэсэн нь жаахан ичмээр сонсогдсон шүү... Энэ жил баруун талын шинэ зуухыг тавьсан. Налайхын "городок"-ыг халааж байсан, 12 байранд хүрэлцэх өндөр хүчин чадалтай, ер нь шатааж алахаар эд гэнэлээ. Тавдугаар цахилгаан станцыг барихаас нааш төвийн системд холбогдох боломжгүй.

Цаад гэр хорооллыг хараарай. Баянзүрх дүүргийн газрын албанаас өмчлүүлэх газар асуухад зөвхөн товчооноос цааш л байгаа гэж байсан. Өөрөөр хэлбэл энэ хавьд гэсэн үг. Дахиад л гэр хороолол дунд орох магадлалтай.

Одоохондоо ч сэлүүхэн, чимээгүй, цэвэр агаартай, сайхан л байна. Харин 11000 айлын орон сууц баригдахаар... 6400 гэсэн тоо ч бас бий.

Төв замын урд нэлээн том хашаатай хаус, таунхаус бүхий хотхон баригдаж байна. Наана нь энэ сайхан ногоон газар хэдхэн жилийн дараа 7-9 давхар орон сууцнууд баригдана. Харин одоохондоо малтай айлууд нэлээн байдаг учраас сүү таргаа шинэхэнээр нь авах боломжтой.

Зүүн тийшээ Налайхруу харахад одоохондоо нэг иймэрхүү. Иргэдэд газар өмчлүүлэх чиглэлд "Ургах наран" хорооллын зүүн талд 15 га газар амины орон сууцны зориулалтаар олгоно гэсэн байсан.

Төв замаасаа 500 м орчим зайтай

Уулзварын хажууханд Налайхын автобус 15 минутын зайтай зогсоно. Хот ортол нэг хүн 500 төгрөг. Тээврийн товчоо ортол маршрутаараа бараг 1 цаг явдаг гэнэлээ. Гэхдээ зүүн 4 зам ортол бөглөө таглаа байхгүй сайхан ш дээ.

Нөгөө том хашаатай хотхонд иймэрхүү таунхаус 10 гаруй баригдаж байна. 

 

 

 

 

Баянзүрхийн товчоон дээрээс эргээд хартал... ээээээ...Петровисийн самбараас баруун тийш харвал уг нь харагдана даа....надад бол харагдаж л байна...хэ хэ... дараа дахиж гоё зураг оруулахаас.

...Хэрэв эдгээр тааруухан зурагнууд танд бага ч гэсэн төсөөлөл өгч чадсан бол УРГАХ НАРАН - МОНГОЛ МӨРӨӨДӨЛ мөн эсэхийг өөртөө тунгаана биз ээ.