Өдөрлөг гэдэг нь өдрийн цэнгүүн, үдэшлэг гэдэг нь үдшийн цэнгүүн гэсэн утгатай бололтой. Цэнгүүн юм чинь цэнгэн хөгжилдөх нь лав. Төрийн байгууллагууд ажлын тайлангаа цэнгэн хөгжилдөх хэлбэрээр олон нийтэд хүргэх санааг ямар зорилгоор анх хэрэгжүүлж эхлэснийг мэдэхгүй ч өнөөдрийн хувьд холуур явааг нь дуудаж, ойр байгааг нь хашраах зорилготой нь тодорхой боллоо.

Оршил бичихийн учир нь Нийслэлийн Газрын Албаны нээлттэй өдөрлөгт ирсэн хүмүүст ажил хэрэг сонирхохоос илүүтэй урлагийн бүрэн хэмжээний тоглолт үзэх нь сонин байсан юм. Ингэж сатааруулах зорилготой байсан ч байж болно. Ажил сонирхох хүсэлтэй нь асуултаа хоолойн цараагаа гайхуулан байж асуух, хариултаа сонсголын чадвараа шалган байж авах хэцүүхэн нөхцөлтэй тулгарч байлаа. Хариулж байгаа нөхдүүд ч мөн адил чадвараа шалгасан байж таарна. Хэрэв мэдээллийн гэр асруудаа хүчирхэг дууны өсгөгчдөөс хол байрлуулсан бол дээрх хүндрэлийг арай зөөлнөөр хүлээн авч болох байсан болов уу. Хэдхэн хоногийн өмнө Сүхбаатар дүүргийнхэн мөн адил ажлаа танилцуулахад ийм хүндрэл гараагүй нь ажлаа зохион байгуулж чадсаных биз.

Өдөрлөгт дүүрэг болгоны нэрийн өмнөөс дуулж хуурдсан оролцогчдын бүрэлдэхүүн залуучуудын санаанд 200 хувь нийцсэн биз ээ. Заримыг нь дурдвал: "Лемонс", "Чоно", "Эй-саунд", "Нисванис" хамтлагууд, Гантулга, Баярцэцэг, Мөнхбат, Наранзун, Одноо, Алтанцэцэг... гээд өөр олон дуучид тус бүрдээ 2-3 дуу дуулж үзэгчдийн сонорыг мялаасан бөгөөд эдний дунд бидний хэлдгээр сайн дурын уран сайханчид байсангүй. Та анзаарсан бол эд бүгдээрээ хямд бараа биш. Товчхондоо Газрын Албаны бярыг мэдрүүлсэн тоглолт болсон юм.

Улаанбаатар хот хэдэн дүүрэгтэй вэ? Хариулах гэж бүү яараарай. Өдөрлөгт оролцсоноор бол 6 дүүрэгтэй юм байна. Алслагдсан хэмээх 3 дүүрэг хэрэв хотын харьяалалд байдаг, ажил төрлийн уялдаатай нь үнэн бол энд байх байсан гэж мэлзэх гээд байна л даа. Багануур, Багахангай, Налайх гурвыг ингэж сонирхох учир нь иргэнд үнэгүй өмчлүүлж буй газар одоогоор зөвхөн эдгээр дүүргүүдэд олгогдож байгаа гэсэн мэдээллийг Нийслэлийн Газрын Албанаас өгсөнд байлаа. Төвийн 6 дүүрэгт газар олж авна гэдэг өдрөөс өдөрт мянгуужингийн үлгэртэй төстэй болж байгаа тул сонирхлыг минь улам дэврээсэн нь тэр.

Эцэст нь нэмэж хэлэхэд сүүлийн үед нээлттэй хаалганы өдрүүд яагаад чимээ аниргүй явагдах болов. 10 сарын 10-нд Үл хөдлөх хөрөнгийн бүртгэлийн газрын нээлттэй хаалганы өдөр бараг хүнгүй болж өнгөрсөн. Өнөөдөр ч ажил хэрэг сонирхсон хүн цөөн байлаа.

Ажлаа олонд танилцуулах сонирхол нь багассанаас чимээгүйхэн цагийг нь тулгаж байгаад мэдээлсэн болоод өнгөрөх санаа байна уу, үгүй юу? Танилцуулж байгаа ажлаа өдрийн цэнгүүн болгож, өнгөлөн далдлалт хийх сонирхол бас байна уу, үгүй юу?