Өчигдөр буюу 2009 оны 10 сарын 21-ний учир ерөөл бүрдсэн билэгт сайн өдөр "Жигүүр гранд" групп өөрийн 3 он дамнуулан хэрэгжүүлсэн томоохон төсөл болох "ГРАНД ПЛАЗА" худалдаа үйлчилгээ, оффисийн цогцолбороо албан ёсоор дуу хууртай нээлээ. Энхтайваны өргөн чөлөөнд, МҮЭСТО-ны баруун талд баригдсан, нийт 41375 м2 талбайтай, архитектур дизайны гоёмсог шийдэл бүхий 15 давхар энэхүү цогцолбор нь Монголын барилгын салбарт нэгэн цоо шинэ хуудас нээлээ.

   В2 давхар нь гараж, В1 давхар нь хүнсний супермаркет, жижиглэнгийн худалдаа, 1-6 давхар нь төрөл бүрийн худалдаа, үйлчилгээ, 7-15 давхар нь оффисийн зориулалттай бөгөөд Shopping Center гэх В1-6 давхартаа урсдаг шатнаас гадна ачааны 2, зорчигчийн энгийн 4, шилэн 2 лифт суурьлуулсан нь үйлчлүүлэгчдийн сэтгэлд бүрэн нийцнэ гэдэгт итгэлтэй байна.

  Оффисийн цэвэр талбай нь 9673 м2 бөгөөд өрөө болгонд агааржуулалтын тохируулагч систем, хувцасны шкаф, бүрэн тоноглосон ариун цэврийн өрөө хийж өгсөн нь хэн бүхэнд таашаагдах нь лав.

  Түүнчлэн 60 автомашины дулаан гараж, агуулах, харуул хамгаалалтын нэгдсэн систем, гоёмсог гэрэлтүүлэг, цэвэрлэгээ үйлчилгээнээс гадна 3 талаасаа орох нөхцөлийг бүрдүүлж, автомашины ил зогсоолуудыг цөөнгүй бэлджээ.